Ssaabasajja Kabaka Ronald Muwenda Mutebi II alagidde abantu okwettanira enkola za Yinzuwa naddala ezikola ku byobulamu, basobole okufunanga obujjanjabi obwetaagisa, mu kiseera kino ng’endwadde zeyongedde.
Mu bubaka bwatisse Omulangira Daudi Cchwa mu kuggulawo olusiisira lw’ebyobulamu olwategekeddwa Kabaka Foundation ku mbuga y’essaza Kyaggwe e Mukono, Ssaabasajja alagidde abantu be okwekwata Yinsuwa olwo bayambibwe mu kaseera webeetaagira obujjanjabi baleme kukaluubirizibwa nnyo.
Mu kuggulawo olusiisira luno era Omulangira Daudi Cchwa mwatongolezza n’omukago wakati wa Buganda ne Yinsuwa ya Jubilee ey’ebyobulamu.
Olusiisira luno lwetabiddwamu enkuyanja y’abantu abazze okusomesebwa, okukeberebwa endwadde n’okuweebwa obujjanjabi byonna ku bwereere, n’abalala okugaba omusaayi
Ssenkulu wa Kabaka Foundation Omuk.Kaggwa Ndagala agambye nti Ssaabasajja yalagira Kabaka Foundation okutalaaga amasaza ge gonna ng’ekubayo ensiisira z’ebyobulamu okukebera abantu be endwadde,era ensiisira ez’engeri eno bakyazitegeka.
Lwetabiddwamu Omulabirizi w’e Mukono Enos Kitto era mmemba ku Bboodi ya Kabaka Foundation, minister w’ebyobulamu Owek. Cotilda Nakate Kikomeko, Ssekiboobo Vicent Matovu Bintubizibu, Ssenkulu wa Weerinde Insurance Omuk. Mirembe Ssensuwa n’abantu abalala bangi ddala.#
